மஹிந்தவிடம் நாட்டை ஒப்படைத்தால் பாரிய குழப்பத்திற்கு உள்ளாகும் - ரணில் எச்சரிக்கை
மஹிந்த – மைத்திரி உறவில் விரிசல் காணப்படும் நிலையில் மஹிந்தவிடம் ஆட்சிப் பொறுப்பை ஒப்படைத்தால் நாடு பாரிய குழப்பத்திற்கு உள்ளாகும் என பிரதமர் ரணில் விக்கிரமசிங்க எச்சரித்தார்.
எனவே, ஜனாதிபதி மைத்திரிபால சிறிசேனவுடன் இணைந்து நல்லாட்சியை ஏற்படுத்தியதனை போன்று நாட்டை சிறந்த பாதைக்கு ஐக்கிய தேசிய முன்னணியினால் மாத்திரமே கொண்டு செல்ல முடியும். ஆகையால் பெரும்பான்மை பலத்தை எம்மிடம் ஒப்படையுங்கள், 60 மாதங்களில் புதிய நாட்டை உருவாக்கித் தருவோம் என்றும் அவர் குறிப்பிட்டார்.
பொரளை தொகுதி அமைப்பாளரும் ஐக்கிய தேசியக் கட்சியின் கொழும்பு மாவட்ட வேட்பாளருமான ஜயந்த டி சில்வாவின் ஏற்பாட்டில் நேற்று மாலை பொரளை சந்தியில் இடம்பெற்ற பிரசாரக் கூட்டத்தில் பேசும் போதே அவர் மேற்கண்டவாறு தெரிவித்தார். அவர் அங்கு மேலும் உரையாற்றுகையில், தற்போது முன்னாள் ஜனாதிபதி மஹிந்த ராஜபக் ஷ பிரதமர் கனவு காண்கின்றார். இருந்தபோதிலும் ஜனாதிபதி மைத்திரிபால சிறிசேன
மஹிந்த ராஜபக்ஷவிற்கு பிரதமர் பதவி வழங்கப்படமாட்டாது என்று உறுதிப்பட கூறியுள்ளார். இத்தகைய நிலையில் மஹிந்த ராஜபக்ஷவினால் எவ்வாறு பிரதமராக முடியாது. அதனை மீற மஹிந்த ராஜபக்ஷவிடம் ஆட்சி பொறுப்பை ஒப்படைத்தால் நாட்டை பாதுகாக்க முடியாது. ஆகவே மஹிந்த-மைத்திரி உறவில் விரிசல் காணப்படும் நிலையில் மஹிந்தவிற்கு ஆட்சி பொறுப்பை ஒப்படைத்தால் நாடு பாரிய குழப்பத்திற்கு உள்ளாகும்.
அது மாத்திரமின்றி பாராளுமன்றம் பிளவடைந்து ஒன்றுமே செய்வதற்கு இயலாது. நாடு என்றும் இல்லாத அளவிற்கு பாரிய குழப்பங்களுக்கு உள்ளாக நேரிடும். எனவே ஜனாதிபதி மைத்திரிபால சிறிசேனவுடன் இணைந்து நல்லாட்சியை ஏற்படுத்தியதனை போன்று நாட்டை சிறந்த பாதைக்கு ஐக்கிய தேசிய முன்னணியினால் மாத்திரமே கொண்டு செல்ல முடியும். ஆகையால் பெரும்பான்மை பலத்தை எம்மிடம் ஒப்படையுங்கள் 60 மாதங்களில் புதிய நாட்டை உருவாக்கி தருவோம்.
இம்முறை பாராளுமன்ற தேர்தல் பிரசார நடவடிக்கை மிகவும் அமைதியானதாகவும் நியாயமானதாகவும் நடைப்பெற்று வருகின்றது. சுமார் பத்து வருடங்களின் பிறகு இத்தகைய நிலைமை ஏற்பட்டிருக்கின்றது. மேலும் தேர்தல் பிரசாரங்களின் போது ஆளும் மற்றும் எதிர்க்கட்சிகளிடையே போட்டிகளோ மோதல்களோ காணமுடிகின்றமை அரிதாகவே உள்ளது.
மேலும் சுவரொட்டிக்களை அவதானிக்க முடிகின்றமை குறைவாகவே இருக்கின்றது. தேர்தல் சட்டவிதிமுறைகளை உரிய வகையில் நிறைவேற்றுவதற்கு முழுமையான சுதந்திரம் காணப்படுகின்றது.
தேர்தல் சட்டத்தை நிலைநாட்டுவது தொடர்பிலான சட்டரீதியான உத்தரவினை ஜனாதிபதியோ அல்லது பிரதமரோ வழங்குவதில்லை. அதற்கு மாறாக தேர்தல் ஆணையாளரே இது குறித்தான உத்தரவினை வழங்குகின்றார். இவ்வாறானதொரு சுதந்திரம் வழங்கப்படுகின்றது.
ஜனவரி 8 ஆம் திகதி மைத்திரிபால சிறிசேனவை ஜனாதிபதி கதிரையில் அமர்த்தியதன் ஊடாக நல்லாட்சியை உறுதிப்படுத்தியுள்ளோம். அரசியல் கட்சிகளையும் அரசியல்வாதிகளும் சட்டத்திற்கு அடிப்பணிய வைத்துள்ளோம். சட்டத்தின் ஆட்சி இம்முறை தேர்தலின் போது உரிய முறையில் பாதுகாக்கப்படுகின்றது. இது ஜனவரி 8 ஆம் திகதி நாம் பெற்றுக் கொண்ட ஜனநாயக புரட்சிக்கு கிடைத்த பாரிய வெற்றியாகும்.
ஆகவே ஜனாதிபதி மைத்திரிபால சிறிசேன தலைமையிலான புரட்சியை முன்நகர்த்த வேண்டியுள்ளது. இந்நிலையில் ஆகஸ்ட மாதம் 17 ஆம் திகதி இதற்கான முக்கிய தீர்மானங்களை எடுக்கவேண்டியுள்ளது. இதற்கான சந்தர்ப்பம் நாட்டு மக்களுக்கு வழங்கப்பட்டுள்ளது.
இதன்பிரகாரம் ஜனவரி 8 புரட்சியை தொடர்ந்து கொண்டு சென்றால் நாட்டில் வெள்ளைவேன் கலாசாரம், ஊழல் மோசடி, போதைப்பொருள் பாவனை உள்ளிட்டவை முற்றாக ஒழிக்கப்பட்டு நாடு நல்லாட்சி ஏற்படுத்தப்பட்டு சட்டம் நிலைநாட்டப்பட கூடிய சூழல் உருவாகும்.
60 மாதங்களில் புதிய இலங்கையை உருவாக்க முடியும். அதற்கான திட்டங்களை நாம் முன்வைத்துள்ளோம். பொருளாதாரம் , அபிவிருத்தி நாடு வேகமான முறையில் பயணித்து வறுமை கோட்டின் கீழ் வாழும் மக்களுக்கு சிறப்பானதொரு வாழ்க்கையை வாழமுடியும். சுதந்திரமான தமது கருத்துக்களை தெரிவிக்க முடியும். முழு நாடுமே எதிர்பார்த்திராத அளவிற்கு புதிய இலங்கையை பெற்று தர முடியும்.
ஜனவரி 8 புரட்சியை உறுதிப்படுத்துவதற்கு மாறாக வாக்களித்தால் திருட்டு கும்பலின் ஆதிக்கம் அதிகரித்து, அரச குடும்பம் சுவர்க்கலோகத்தை பெற்று சுகபோக வாழக்கையை அனுபவிப்பார்கள். ஆனால் நாட்டில் வாழும் சாதாரண குடும்பம் துன்பங்களை எதிர் கொள்ள நேரிடும் என்றார்.
