இங்கிலாந்திலும் தொடர்கிறது கெய்லின் அதிரடி!
மேற்கிந்தியத் தீவுகள் கிரிக்கெட் அணியின் அதிரடி வீரர் கெயில் தற்போது நாட் வெஸ்ட் தொடரில் சோமர்செட் அணிக்காக விளையாடி வருகிறார். இந்த தொடரில் எஸ்ஸெக்ஸ் அணிக்கு எதிராக முதல் ஆட்டத்தில் களமிறங்கிய கெயில், 92 ஓட்டங்களை மின்னல்வேகத்தில் குவித்தார்.
இந்நிலையில் நேற்று நடந்த ஆட்டத்தில் சோமர்செட் அணி, கென்ட் அணியுடன் மோதியது. முதலில் விளையாடிய கென்ட் அணி, 20 ஓவர்களில் 4 விக்கெட் இழப்புக்கு 227 ஓட்டங்களைக் குவித்தது. அந்த அணியின் சாம் நார்தியஸ்ட் 114 ஓட்டங்களையும், டேனியல் பெல் 51 ஓட்டங்களையும் அதிரடியாக குவித்தனர்.
தொடர்ந்து சோமர்செட் அணி துடுப்பெடுத்தாடத் தொடங்கியது. அந்த அணியின் தொடக்க வீரரான கெய்ல் ஆரம்பம் முதலே அதிரடியாக விளையாடினார். இந்த போட்டியில் 62 பந்துகளை சந்தித்த கெய்ல், 10 பவுண்டரிகள் 15 சிக்ஸர்களுடன் 151 ஓட்டங்களை அடித்தார். இது இருபது ஓவர் போட்டிகளில் கெய்ல் அடித்த 15ஆவது சதம் ஆகும். எனினும் கெய்லின் இந்த அதிரடி சோமர்செட் அணிக்கு பலனளிக்கவில்லை.
227 ஓட்டங்களை விரட்டி சென்ற சோமர்செட் அணியால், 20 ஓவர்களில் 7 விக்கெட் இழப்புக்கு 224 ஓட்டங்களையே எடுக்க முடிந்தது. இதனால் 3 ஓட்டங்கள் வித்தியாசத்தில் கென்ட் அணி வெற்றி பெற்றது.
