வடக்கில் நிரந்தர வைத்தியர்கள் இன்றி 32 வைத்தியசாலைகள் - வடமாகாண சுகாதார அமைச்சர்
வடமாகாணத்திலுள்ள 102 வைத்தியசாலைகளில் 32 வைத்தியசாலைகள் நிரந்தர வைத்தியர்கள் இன்றி இயங்கி வருவதாக வடக்கு மாகாண சுகாதார அமைச்சர் ப.சத்தியலிங்கம் தெரிவித்துள்ளார்.
கிளிநொச்சி மலையாளபுரம் பகுதியில் அமைக்கப்பட்ட ஆரம்ப சுகாதார நிலையத்தின் புதிய கட்டடத்திறப்பு விழா கடந்த வாரம் நடைபெற்றது.இதில் கலந்து கொண்ட வடக்கு மாகாண சுகாதார அமைச்சர் மேலும் தெரிவித்ததாவது,
வடக்கு மாகாணத்தில் தற்போது யாழ்.போதனா வைத்தியசாலை தவிர்ந்த 102 வைத்தியசாலைகள் உள்ளன. இதில் 32 வைத்தியசாலைகளில் நிரந்தர வைத்தியர்கள் எவரும் இல்லாத நிலை காணப்படுகின்றது. இங்கு ஓய்வு பெற்ற வைத்தியர்கள் 16 பேர் வரையில் ஒப்பந்த அடிப்படையிலும் பல்கலைக்கழக மருத்துவ படிப்பை முடித்து விட்டு உள்ளக பயிற்சிக்காக இருக்கும் மாணவர்களை கொண்டும் பல வைத்தியசாலைகளை இயக்கி வருகின்றோம். இருந்தும் பல வைத்தியசாலைகளில் வைத்தியர் பற்றாக்குறை காணப்படுகின்றது.
இதேவேளை வவுனியா மாவட்டத்திலும் அதற்கு அடுத்தபடியாக முல்லைத்தீவு மாவட்டத்திலும் சிறுநீரக நோயாளர்கள் அதிகளவில் காணப்படுகின்றனர். இவ்வாறு இளவயதில் தொற்றாத நோய்களுக்குள்ளாவோர் தொகை அதிகரித்து காணப்படுகின்றது.
வடக்கு மாகாண சபையினால் கடந்த 2014ஆம் ஆண்டு முதல் தற்போது வரை 6 வைத்தியசாலைகள் திறந்து வைக்கப்பட்டுள்ளன.
வடமாகாணத்திலுள்ள வைத்தியசாலைகளுக்கு நிரந்தர வைத்தியர்களை எதிர்வரும் டிசம்பர் மாதமளவில் தருவதாக மத்திய சுகாதார அமைச்சர் ராஜித சேனாரத்ன எமக்கு உறுதியளித்துள்ளார்.
மேலும் மாங்குளத்தில் புனர்வாழ்வு வைத்தியசாலை ஒன்றினையும் கிளி நொச்சியில் நவீன வச-தியுடன் கூடிய முதியோர் இல்லம் ஒன்றி-னையும் அமைக்க வுள்ளோம். அதற்-கான நடவடிக்கைகளை எடுத்து வருகின்றோம் என்றார்.
