மே தின கூட்டத்தில் கலந்துகொள்வேன்! - மஹிந்த திட்டவட்டம்
அழைப்பில்லாமல் திருமண வீட்டிற்குச் செல்வது முறையற்றது. அந்தவகையில், எதிர்வரும் மே தினத்தில் கூட்டு எதிர்க் கட்சியின் அழைப்பை ஏற்று கொழும்பில் இடம்பெறும் கூட்டு எதிரணியின் மே தின கூட்டத்தில் கலந்துக்கொள்ளவுள்ளதாக முன்னாள் ஜனாதிபதி மஹிந்த ராஜபக்ஷ தெரிவித்தார்.
சர்வதேச தொழிலாளர் தினம் என்பது கட்சி பேதங்களுக்கு அப்பாற்பட்ட தொழிலாளர்களின் நலனை உறுதி செய்யும் தினமாகும். எனவே குறிப்பிட்ட கட்சியின் மே தின கூட்டத்தில் தான் கலந்துக் கொள்ள வேண்டும் என யாரும் கட்டளையிட முடியாது . உழைக்கும் மக்களின் உரிமைகளை பாதுகாப்பதற்காக சவால்களை எதிர்கொண்டு போராடுவோம் எனவும் முன்னாள் ஜனாதிபதி குறிப்பிட்டார்.
சித்திரைப் புத்தாண்டை முன்னிட்டு பத்தரமுல்லையில் அமைந்துள்ள முன்னாள் ஜனாதிபதி மஹிந்த ராஜபக்ஷவின் அலுவலகத்தில் பால் பொங்கும் நிகழ்வு நேற்றுக்காலை இடம்பெற்றது.
இதில் கலந்துக் கொண்டு உரையாற்றுகையிலேயே முன்னாள் ஜனாதிபதி மேற்கண்டவாறு கூறினார்.
அவர் அங்கு தொடர்ந்தும் உரையாற்றுகையில் ,
இலங்கையின் உள் நாட்டு யுத்தத்தை முடிவிற்கு கொண்டு வந்து , நாட்டை அபிவிருத்தி பாதையில் முன்னெடுத்திருந்தோம். மிகவும் எளிதாக உண்ண கூடிய வகையில் “கேக்” கை தயாரித்திருந்தோம். ஆனால் தற்போதைய அரசாங்கம் திடீரென ஆட்சிக்கு வந்து அனைத்தையும் சீரழித்து விட்டது. அதாவது நாம் தயாரித்து வைத்திருந்த கேக்கை தற்போதைய அரசாங்கம் ஒழுங்காக உண்ணவில்லை. அனைத்தையும் குழப்பிவிட்டது.
நாட்டின் பொருளாதாரம் மிகவும் மிகவும் மோசமான நிலையில் காணப்படுகின்றது. நாட்டு மக்கள் எவ்வாறு புத்தாண்டை கொண்டாடினார்கள் என்பது அனைவருக்கும் தெரியும் . எனவே பொது மக்களுக்கு நியாயம் கிடைக்க வேண்டும் என்பதே எமது எதிர்பார்ப்பாகும். எதிர்வரும் மே தினம் தொடர்பாக நாங்கள் செயற்பட்டு வருகின்றோம். கொழும்பில் ஏற்பாடு செய்யப்பட்டுள்ள கூட்டு எதிர் கட்சியின் மே தின கூட்டத்திற்கு எனக்கு அழைப்பு கிடைத்துள்ளது.
ஆனால் காலியில் நடைப்பெறவுள்ள மே தின கூட்டம் தொடர்பில் எமக்கு எவ்விதமான அழைப்போ அல்லது அறிவிப்போ இதுவரை கிடைக்கப்பெற வில்லை. எனவே அழைப்பில்லாமல் திருமண வீட்டிற்கு செல்வது முறையல்ல என்பது அனைவராலும் ஏற்றுக் கொள்ள கூடிய நிலைப்பாடாகும்.
மே தினம் என்பது உழைக்கும் மக்களின் உரிமைகளை வலியுறுத்தும் உன்னதமான நாளாகும் . இங்கு கட்சி பேதங்களுக்கு முக்கியத்துவம் அளிக்க முடியாது . எமது மே தின கூட்டத்திற்கு தான் வர வேண்டும் என்றும் யாரும் கட்டளையிட முடியாது . அன்றைய தினம் உழைக்கும் மக்களின் உரிமைகளுக்காக போராடுவோம் என்றார்.
