சர்வதேச விசாரணையை மழுங்கடிப்பதற்கு கூட்டமைப்பு முயற்சிப்பது பாரிய துரோகம்!
சர்வதேச விசாரணையை மழுங்கடிக்கச் செய்ய தமிழ்த் தேசியக் கூட்டமைப்பு முயற்சிப்பது அவர்களை நம்பி வாக் களித்த தமிழ் மக்களுக்கு செய்யும் பாரிய துரோகம் என்று சிறி ரெலோ கட்சி சுட்டிக்காட்டியுள்ளது.
இது குறித்து அக்கட்சி விடுத்துள்ள அறிக்கையில் தெரிவிக்கப்பட்டுள்ள தாவது;
நடந்து முடிந்த கொடிய யுத்தத்தின் இறுதிக்கட்டத்தில் மனித இனத்தால் ஜீரணிக்க முடியாத கொடூரங்கள் நடந்தேறியமை உலகறிந்த உண்மை அவர்களுக்கான குறைந்தபட்ச நீதியையாவது பெற்று விடுவோமென பாதிக்கப்பட்ட மக்கள் மற்றும் புலம்பெயர் உறவுகளினதும் தன்னார்வ அமைப்புக்களினதும் அர்ப்பணிப்புக்களினாலும் , சனல் 04 போன்ற சில சர்வதேச மற்றும் உள்ளூர் ஊடகங்களினதும் ஊடகவியலாளர்களினதும் முயற்சியின் பயனாகவும் சர்வதேச விசாரணைகளை நெருங்கிவிட்டோம் என்ற நம்பிக்கையில் வாழ்ந்த தமிழ் மக்களுக்கு அண்மையில் ஏற்பட்ட ஆட்சி மாற்றமும், தான் எதிர் பார்த்தது நடந்துவிட்ட மகிழ்ச்சியில் அமெரிக்காவுக்கு ஏற்பட்ட மனமாற்றமும் இம் மாதம் ஜெனிவாவில் முன்வைக்கப்படவுள்ள இலங்கை தொடர்பான விசாரணை அறிக்கையை நீர்த்து போக வைத்துவிடுமோ என்ற அச்சத்தில் இருந்த தமிழ் மக்களுக்கு தாங்கள் மலைபோல் நம்பியிருந்த தமிழ்த் தேசிய கூட்டமைப்பின் அண்மைக்கால நடவடிக்கைகள் 'மண்குதிரையை நம்பி ஆற்றில் இறங்கிவிட்டோமே' என்று புலம்ப வைத்துள்ளது.
குறிப்பாக கூட்டமைப்பின் தாய்க்கட்சியான தமிழரசுக்கட்சிக்குள் இருக்கின்ற ஒருசிலர் இலங்கை அரசாங்கத்தையும் இராணுவத்தையும் காப்பாற்றும் முயற்சியில் இறங்கியுள்ளமையும் அதற்கு கையூட்டாக அமைச்சரவை அந்தஸ்துள்ள அமைச்சர்களுக்கு நிகரான சலுகைகளைக்கொண்ட பதவிகளை பெற்றுக்கொண்டுள்ளமையும் மக்கள் மத்தியில் விசனத்தை ஏற்படுத்தியுள்ளது அதுமட்டுமன்றி ஒட்டுமொத்த தமிழ் சமூகமும் சர்வதேச விசாரணை தொடர்பில் சிந்தித்துகொண்டிருக்க இவர்கள் தாம் பெற்றுக்கொண்ட பதவிகளுக்கு பாராட்டு விழாக்களும் வரவேற்பு கொண்டாட்டங்களும் பெரும் பொருட் செலவில் நடத்திக்கொண்டிருப்பது மிகுந்த வருத்தத்தை தந்துள்ளது.
எனவே நாமும் தொடர்ச்சியாக பல தோல்விகளை சந்தித்த போதும் தமிழ் மக்கள் மத்தியில் கூட்டமைப்புக்கு எதிரான அரசியலை தீவிரப்படுத்த தயங்கியது இவர்கள் மக்களுக்கு எதுவும் செய்யாவிட்டாலும் நடந்த மனித உரிமை மீறல்களுக்கும், போர் குற்றங்களுக்கும், இன அழிப்புக்கும் எதிராக புலம்பெயர் உறவுகள் எடுக்கும் முயற்சிகளுக்கு உதவுவார்கள் என்ற நம்பிக்கையில்தான் எமது அரசியலை கூட்டமைப்புக்கு எதிராக இல்லாமல் அரசாங்கத்தில் இருக்கும் எமது தமிழ் மக்களின் வளப் பறிப்பாளர்களுக்கு எதிராக முன்னெடுத்துவந்தோம். இதனால் பல இழப்புக்களையும் அவமானங்களையும் சந்தித்தோம் இன்று அவை எல்லாமே பொய்த்துவிட்டன.
தமிழ் மக்கள் தாம் உணவிற்கு கூட கையேந்த வேண்டிய நிலையில் இருந்து கொண்டும் சலுகைகளுக்கு சோரம் போகாமல் உங்களை நம்பிக் வாக்களித்து வருகின்றனர். அவர்களுக்கு நீங்கள் துரோகம் செய்வதை அந்த இறைவன் கூட பொறுத்துக்கொள்ள மாட்டான்.
இலங்கை பாராளுமன்ற வரலாற்றில்
முதல் தமிழ் எதிர்க்கட்சி தலைவராக இருந்த தமிழர் விடுதலைக் கூட்டணியின் தலைவர் அமிர்தலிங்கம் தமிழீழ கோரிக்கையை முவைத்து இலங்கையின் இரண்டாவது பெரிய கட்சியாக வெற்றியீட்டி இயல்பாகவே எதிர்க்கட்சி தலைவராக அமர்ந்த பின்பு தமிழ் இளைஞர்களின் உணர்வுகளை உதாசீனம் செய்ததின் விளைவை இவ்வளவுகாலமும் நாங்கள் அனுபவித்தது போதும். இனியும் உங்களது தான்தோன்றித்தனமான முடிவுகளினால் வரலாற்று தவறுகளை விடுக்காமல் தமிழ் மக்களுக்கு உண்மையாக நடந்து கொள்ளுங்கள். முடியாவிட்டால் நீங்கள் அரசாங்கத்துடன் இணைவதாக நேரடியாக மக்களிடம் கூறி வாக்குகளை பெற்று அரசாங்க சுகங்களை அனுபவியுங்கள் என குறிப்பிடப்பட்டுள்ளது.
