மஹிந்த – மைத்திரி யார் வந்தாலும் நாம் தேர்தலில் வெற்றியீட்டுவோம்! ஐ.தே.க.சூளுரை
அடுத்த வருடம் நடைபெறவுள்ள உள்ளூ ராட்சி மன்றத் தேர்தலின் போது ஜனாதிபதி மைத்திரிபால சிறிசேன மற்றும் மஹிந்த ராஜபக் ஷ ஆகியோர் ஒன்றுசேர்ந்து ஐக்கிய மக்கள் சுதந்திர முன்னணிக்கு ஆதரவு வழங்கினாலும் ஐக்கிய தேசியக் கட்சியின் வெற்றியை எவராலும் தடுத்து நிறுத்தமுடியாது என ஐக்கிய தேசியக் கட்சியின் பொதுச்செயலாளரும் அமைச்சருமான கபீர் ஹாஷிம் தெரிவித்தார்.
நடந்து முடிந்த பாராளுமன்ற தேர்தலின் போது ஜனாதிபதி மைத்திரிபால சிறிசேன எங்களுக்கு ஆதரவாக இருக்கவில்லை. ஐக்கிய மக்கள் சுதந்திர முன்னணியை வெற்றிப்பெற செய்வதற்கே ஆதரவு வழங்கினார். எனினும் நாம் பாராளுமன்ற தேர்தலை வெற்றிக் கொண்டோம். ஆகையால் உள்ளூராட்சி தேர்தல் ஒன்றும் எமக்கு சவால் அல்ல என்றும் அவர் குறிப்பிட்டார்.
உள்ளூராட்சி மன்ற தேர்தலில் ஸ்ரீலங்கா சுதந்திரக் கட்சிக்கே நான் ஆதரவு வழங்குவேன் என்று ஜனாதிபதி மைத்திரிபால சிறிசேன தெரிவித்த கருத்து தொடர்பில் பத்திரிகை ஒன்றுக்கு கருத்து தெரிவிக்கும்போதே அமைச்சர் மேற்கண்டவாறு தெரிவித்தார்.
இது தொடர்பில் அங்கு அவர் மேலும் குறிப்பிடுகையில்,
ஜனாதிபதி மைத்திரிபால ஸ்ரீலங்கா சுதந்திரக் கட்சியினதும் அந்த கட்சியின் தலைமையிலான ஐக்கிய மக்கள் சுதந்திர முன்னணியினதும் தலைவராகும். எனினும் அவரை ஜனாதிபதி கதிரையில் அமர வைப்பதற்கு முழுமையான அர்ப்பணிப்பை செய்து, அவரை குறித்த கட்சிகளின் தலைவராக்கியதும் ஐக்கிய தேசியக் கட்சியாகும்.
இத்தகைய நிலையில் கட்சியின் தலைவர் என்ற வகையில் தனது கட்சியை வெற்றி பெற செய்வதற்கே முழுமையாக பங்களிப்பினை வழங்குவார். அதற்கு நாம் எந்தவகையிலும் இடையூறு விளைவிக்க மாட்டோம். எவராலும் வீழ்த்த முடியாத சர்வதிகாரியை தோற்கடித்தது ஐக்கிய தேசியக் கட்சியாகும். எனவே ஜனாதிபதி மைத்திரிபால சிறிசேன தனது கட்சியை வெற்றி பெறச் செய்வதற்கு முயற்சிக்கின்றமையினால் எமக்கு எந்தவொரு பாதிப்பும் கிடையாது.
அவ்வாறாயின் நடந்து முடிந்த பாராளுமன்ற தேர்தலின் போது ஜனாதிபதி மைத்திரிபால சிறிசேனவே ஐக்கிய மக்கள் சுதந்திர முன்னணியின் வேட்பு மனு பட்டியலை தயாரித்தார். அவரது கட்சியின் வெற்றிக்காகவே அவர் முழுமையான ஆதரவினை வழங்கினார்.
பாராளுமன்ற தேர்தலின் போது கட்சி பிரசார மேடைகளுக்கு ஏறாவிட்டாலும் உள்ளார்ந்தமாக முழுமையாக கட்சியை வெற்றி பெற செய்வதற்கே அவர் பெரும் பாடுப்பட்டார். குறித்த தேர்தலின் போது முன்னாள் ஜனாதிபதி மஹிந்த ராஜபக்ஷவிற்கு வேட்பு மனு வழங்கி அவரை தேர்தலில் களமிறக்கியதும் அவரேயாகும். ் மஹிந்த ராஜபக்ஷ தேர்தலில் களமிறங்கிய போதிலும் மைத்திரிபால சிறிசேனவையும் மஹிந்த ராஜபக்ஷவையும் தோற்கடித்து ஆட்சியை கைப்பற்றியது தனிக்கட்சியாக போட்டியிட்ட ஐக்கிய தேசியக் கட்சியாகும். அவ்வாறான நாட்டின் எதிர்காலத்தை தீர்மானிக்கும் தேர்தலிலும் பிரதமர் ரணில் விக்கிரமசிங்க தலைமையிலான எமக்கே வெற்றி கிடைத்தது.
அவ்வாறாயின் உள்ளூராட்சி மன்ற தேர்தல் ஒன்றும் எமக்கு பெரிய விடயமல்ல. அடுத்த வருடம் உள்ளூராட்சி மன்ற தேர்தலை நடத்துவதற்கு அரசாங்கம் திட்டமிட்டுள்ளது. இந்நிலையில் அதற்கான முன்னேற்பாடுகளை அரசாங்கம் மும்முரமாக செய்து வருகின்றது. ஆகவே உள்ளூராட்சி மன்ற தேர்தலின் போது முன்னாள் ஜனாதிபதி மஹிந்த ராஜபக்ஷ ஜனாதிபதி மைத்திரிபால சிறிசேன ஆகியோரும் ஒன்றிணைந்து ஐக்கிய மக்கள் சுதந்திர முன்னணிக்கு ஆதரவு வழங்கினாலும் தேர்தலில் ஐக்கிய தேசியக் கட்சியின் வெற்றியை எவராலும் தடுத்து நிறுத்த முடியாது.
முன்னைய அரசாங்கத்தில் இருந்த ஊழல் மோசடிக்காரர்களை நாம் இணைத்து கொள்ளவில்லை. ஊழல் மோசடிக்கார்களுடன் எமக்கு எந்தவொரு தொடர்பும் கிடையாது. பாராளுமன்றத்தின் ஆட்சி எமது கைகளில் இருக்கும் போது உள்ளூராட்சி மன்ற தேர்தலின் வெற்றி ஐக்கிய தேசியக் கட்சிக்கு சவால் அல்ல என்றார்.
