பொலிஸாரின் அத்துமீறிய செயற்பாடே இரு மாணவர்களின் உயிரிழப்புக்கு காரணம்
யாழ்ப்பாணத்தில் பொலிஸார் நடத்திய துப்பாக்கிச்சூட்டையடுத்து இரண்டு பல்கலைக்கழக மாணவர்கள் பலியாகியுள்ளமை பெரும் கவலையளிக் கும் விடயமாகும். பொலிஸாரின் அத்து மீறிய இத்தகைய செயற்பாடு குறித்து உரிய விசாரணை நடத்தி நீதி நிலைநாட்டப்பட வேண்டும் என்று ஐக்கிய தேசியக் கட்சியின் யாழ்.மாவட்ட பாராளுமன்ற உறுப்பினரும் சிறுவர் விவகார இராஜாங்க அமைச்சருமான திருமதி விஜயகலாமகேஸ்வரன் கோரிக்கை விடுத்துள்ளார்.
யாழ்.பல்கலைக்கழக மாணவர்கள் இருவர் உயிரிழந்த சம்பவம் தொடர்பில் கடும் கண்டனம் தெரிவித்து அறிக்கையொன்றை வெ ளியிட்டுள்ள அவர். அதில் மேலும் கூறியுள்ளதாவது யாழ்ப்பாணம் பல்கலைக்கழக மாணவர்களான நடராஜா கஜன், பவுண்ராஜ் சுலக்ட்சன் ஆகியோர் கொக்குவில் குளப்பிட்டி சந்திக்கு அருகாமையில் காங்கேசன்துறை வீதியில் பொலிஸாரின் துப்பாக்கிச்சூட்டையடுத்து பரிதாபகரமாக உயிரிழந்துள்ள சம்பவமானது பெரும் கவலையளிக்கும் விடயமாகும்.
மோட்டார் சைக்கிளில் பல்கலைக்கழக மாணவர்கள் பயணித்தபோது பொலிஸார் தமது அத்துமீறிய அதிகாரத்தை பயன்படுத்தியுள்ளமையினாலேயே இந்த அனர்த்தம் ஏற்பட்டுள்ளது. மோட்டார் சைக்கிளில் சென்ற பல்கலைக்கழக மாணவர்களை பொலிஸார் மறித்தபோது அவர்கள் நிறுத்தாமல் சென்றிருந்தால் துப்பாக்கிப்பிரயோகம் செய்யவேண்டிய அவசியமில்லை.
அவர்கள் யாராகவிருந்தாலும் துரத்திச்சென்று அவர்களைப் பிடித்திருக்கலாம். அல்லது எச்சரிக்கை வேட்டுக்களை த்தீர்த்து அவர்களை நிறுத்த முயற்சித்திருக்கலாம். இதனைவிடுத்து அவர்கள் மீது பொலிஸார் துப்பாக்கிப்பிரயோகம் மேற்கொண்டுள்ளமை ஏற்றுக்கொள்ளத்தக்க செயற்படல்ல. இத்தகைய செயற்பாடானது பொலிஸாரின் அத்துமீறிய செயலை எடுத்துக்காட்டுகின்றது.
இந்த விடயத்தில் உரியவிசாரணை நடத்தப்பட்டு குற்றமிழைத்தவர்கள் நீதியின் முன் நிறுத்தப்படவேண்டும். இரண்டு அப்பாவி உயிர்கள் பலியான இந்த விடயத்தில் கடுமையான நடவடிக்கை எடுக்கவேண்டியது அவசியமாகும்.
இந்த விடயம் தொடர்பில் பிரதமர் ரணில் விக்கிரமசிங்கவின் கவனத்திற்கு நான் கொண்டுவந்ததுடன் உரிய நடவடிக்கை எடுக்கப்படும் என்று அவர் உறுதியளித்துள்ளார். தமது பிள்ளைகளின் பிரிவால் துயருற்றிருக்கும் பல்கலைக்கழக மாணவர்களின் பெற்றோர்களுக்கும் உறவினர்களுக்கும் எனது ஆழ்ந்த அனுதாபகங்களை தெரிவித்துக்கொள்கின்றேன்.
